SEMBAHYANGAN UMUM

Sembahyangan Katur Malaékat Pamomong

Dhuh Malaékat pamomong kula ingkang tuhu setya, ingkang kadhawuhan ing Pangéran njagi sukma tuwin badan kula. Dhuh juru pangreksa tuwin pangayomaning sukma kula, ingkang boten naté nilar kula, kados pundi anggèn kula badhé caos atur panuwun dhateng panjenengan, déné panjenengaan tansah karsa njagi, momong kula kanthi setya tuwin tresna, punapa malih karsa paring pitulungan tanpa wicalan dhateng kula.

Awit panjenengan temtu njagi manawi kula tilem, panjenengan temtu paring lipur manawi kula susah, mbombong saha paring lejar ing manah manawi kula saweg prihatos saha kendhak ing manah. Sedaya bebaya ingkang nyaketi, panjenengan béngkas, déné manawi bebaya wau taksih tebih, panjenengan lajeng ngirid kula medal margi padhang. Panjenengan paring pitedah dhateng tindak kasaénan, saha boten nglilani, manawi kula badhé alampah duraka; manawi kula èstu dhumawah ing dosa margi kirang pangatos-atos kula utawi kasèkèngan kula, panjenengan boten kendhat ngrerimuk kula, supados keduwung ing manah, punapa malih panjenengan lajeng nyuwunaken pangapunten dhateng Pangéran. Menggah panjenengan boten tresna saha nyenyuwunaken dhateng Pangéran murih lejaring panggalih Dalem, kula mbokmanawi sampun klebet ing naraka.

Milanipun dhuh Malaékat pamomong kula, kula ngasih-asih ing panjenengan, mugi sampun ngantos nilar kula; mugi paringa panglipur ing salebeting pakèwed, mandhégani yèn wonten bebaya, saha paringa pitulungan ing salebeting panggodha, supados kula sampun ngantos kénging jireting sétan. Mugi karsaa ngunjukaken sembahyangan, pasambat saha padamelan kula dhateng ingarsa Dalem Gusti Allah, punapa malih mugi sarana sih Dalem Gusti, kula sageda lumebet ing gesang langgeng. Amin.

Pasrah Marang Ibu Kenya Maria
(S. Fransiskus saka Sales)

Dhuh Sang Kenya ingkang suci linangkung, Dèwi Maria Ibuning Allah, kawula .... (nyebut jenengé dhéwé), sanadyana boten pantes pisan-pisan ngabdi ing panjenengan dalem, ananging margi katarik ing sih kadarman dalem ingkang ngéram-éramaken punika, sarta saking kapiluyu kawula lumebat dados abdi dalem, sapunika mawi sinèksen Malaékat pamomong kawula, sarta para Minulya ing swarga, milih panjenengan dalem dados Ratu, Pangayoman lan Ibu kawula.

Kawula niyat terus ing manah badhé tansah ngabdi Paduka. Sakuwagang kawula inggih badhé mbudidaya, supados panjenengan dalem tansah dipun abdèni tiyang sadaya kanthi setya tuhu.

Milanipun, o Ibu ingkang ambek tresna, abdi dalem munjuk ngasih-asih, mugi karna rah Dalem Sang Kristus, ingkang sampun katuntasaken kanggé kawula, keparenga ing penggalih mundhut abdi dalem dados golonganing tetiyang ingkang panjenengan dalem ayomi, sarta wisudha dados abdi dalem ing salanggengipun.

Mugi karsaa tansah njangkung dhateng saparipolah kawula, sarta karsaa nyuwunaken sih, murih sasolah-tingkah kawula sampun pisan-pisan ngantos damel gerahing panggalih dalem, utawi Tyas Dalem Gusti ingkang mahasuci.

O Ibu, mugi kawula punika tansah panjenengan dalem panggalih, sampun ngantos wentala ngoncati abdi dalem ing wekdal ajal kawula. Amin.

MALAEKATING ALLAH

Malaekating Allah nglantaraken dhawuh dhateng Kenya Maria. Ajeng Sang Kenya nggarbini saking kuwasaning Hyang Roh Suci.
Sembah bekti kawula ……..

Kawula abdining Allah,
Sandika ing dhawuh Dalem,
Sembah bekti kawula ……..

Sang Sabda lajeng dados manungsa.
Yektos nunggil ing kawula.
Sembah bekti kawula ……..

Ibuning Allah nyuwun pangestu dalem.
Supados pantes nampi ganjaran kasagahan Dalem Sang Kristus.

Suwawi sami munjuk :
Gusti, sarehning kawula sampun dipun wartosi ing Malaekat, bilih Putra Dalem yektos manjalma, mila sami nyuwun sih pitulungan Dalem, supados sarana saking sangsara saha pamenthanganipun Putra Dalem, benjing satangining badan, kawula sageda ndherek kamulyakaken. Lantaran Sang Kristus Gusti kawula. Amin.

Sembahyangan Keluarga

Gusti kawula lan Allah kawula abdi Dalem sowan wonten ing ngarsa Dalem, perlu caos sembah sujud ing sangandhap Sampeyan Dalem ingkang Maha Luhur. Kawula munjuk sembah nuwun, amargi sadaya kasaenan saking Sampeyan Dalem, langkung-langkung amargi kawula sakulawarga sadaya tansa ginanjar wilujeng. Allah Hyang Roh Suci, mugi karsaa rawuh madhangi budi kawula, supados kawula ngertos dhateng dosa kawula, sarta karsaa aparing sih nugraha, supados kawula saged keduwung terus ing manah.

Mbangun keduwung

Allah ingkang Maha Welas, kawula keduwung, dene kawula amargi dosa kawula, pantes kapatrapan siksa saking Sampeyan Dalem, langkung-langkung amargi kawula ngantos adamel gerahing penggalih Sampeyan Dalem, Gusti Allah kawula Ingkang Maha Luhur, ingkang misaeni dhateng kawula tanpa wangenan, sarta jumeneng tuking sadaya kasaenan. Kawula gething dhateng sadaya dosa kawula, saha gadhah niyat, srana sih pitulungan Dalem, badhe ngleresaken gesang kawula, tuwin mboten badhe anglampahi dosa malih-malih, Gusti, kawula tiyang dosa, nyuwun kawelasan Dalem, amin.

Nyuwun Gusti Rawuh

Dhuh, Gusti, estunipun abdi Dalem kawula punika sanget mboten pantes, Gusti badhe rawuh, namung kawula aturi ngandika, sukma kawula temtu badhe saras, amin.

Nyuwun Hyang Roh Suci rawuh

Dhuh Roh ingkang Suci, sumangga kawula aturi tedhak, ing manahipun abdi Dalem tiyang pitados, saha ngurubaken katresnanipun, srana urubing katresnan Dalem, mugi karsaa amaringi Roh Dalem, ingkang lajeng badhe nggesangaken samukawis, saha ngenggalaken kawontenaning jagad. Dhuh, Allah, ingkang sampun karsa paring piwulang dhumateng manahipun para tiyang ingkang sami pitados, srana pepadhang Dalem Allah Hyang Roh Suci, mugi abdi Dalem kawula sakulawarga sadaya tansah sami kalilana angraosaken kawicaksanan ingkang sejatos wonten ing Allah Hyang Roh Suci, saha tansah manggih kabingahan amargi panglipur Dalem Allah Hyang Roh Suci, lantaran Sang Kristus, Gusti kawula, amin.

Nyuwun kaampingan malaekat pamomong

Dhuh Malaekat Agung: Mikael, Gabriel, Rafael, tuwin sadaya Malaekating Allah ingkang wonten ing swarga, ingkang dados pamomong kula, sarta saking sih kadarman Dalem Gusti Allah, Panjenengan sami dipun pasrahi ngreksa kula sakulawarga sadaya, kula aturi madhangi, njagi, ngirid, tuwin nuntun kula sakulawarga, amin.

Nyuwun kasarasan jiwa raga

Dhuh Malaekat Rafael, Malaekating Allah ingkang pinurba adamel kasarasaning jiwa raga sadaya titah, kawula sakulawarga sadaya sami nyuwun kasarasaning jiwa lan badan kawula, sumrambahipun dhateng sesami kawula ingkang nembe sami nandhang sakit, mugi enggal kapulihna kasarasaning jiwa raganipun kados ing wingi uni, amin.

Pesen wigati saka Fatima

Dhuh Sang Kristus, Sampeyan Dalem ingkang Maha Sae lan tresna sanget dhateng sukma-sukma, mugi krana sungkawa Dalem ing taman zaitun, saha sungkawanipun Ibu Dalem, Kanjeng Ibu Kenya Dewi Maria, ingkang mulus tanpa lesa, mugi Sampeyan Dalem karsaa angresikaken tiyang-tiyang dosa sajagad, ingkang sapunika sami ngrekaos saha badhe ndungkap pejah, angagem rah Dalem, ing wasana kawula sami nyuwun berkah Dalem, saha tinebihna saking piawon, ngantos dumugi ing kalanggengan, punapa dene sadaya sukma-sukma ing latu pangresikan, mugi Sampeyan Dalem paringi kabingahan ing Ngarsa Dalem, langkung-langkung sukma-sukma ingkang sanget ambetahaken sih palimirma Dalem Gusti, amin. Dhuh Tyas Dalem Sang Kristus, lantaran Tyasipun Kanjeng Ibu Kenya Dewi Maria, ingkang murni tanpa cacat, kawula sakulawarga sadaya sami ngunjukaken sembahyangan, padamelan, kasangsaran, tuwin gesang kawula sakulawarga sadaya ing saben dintenipun, minangka sembulihipun dosa, lan murih kabulipun ujub sadaya ingkang tanpa kendhat Sampeyan Dalem labeti ngurbanaken Salira Dalem wonten ing altar, langkung-langkung ujubipun pakempalan mangrasul tuwin ujub ingkang sampun jinurungan ing Kanjeng Santo Bapa Paus Benediktus 16 kangge wulan punika, amin. Dhuh Sang Kristus, Sampeyan Dalem ingkang sampun karsa manjalma, nandhang sangsara, sarta seda kasalib amrih wilujeng kawula, mugi Sampeyan Dalem tansah karsa aparing kawilujengan, kabegjan, tuwin kasarasan dhumateng kawula sakulawarga, sumrambahipun dhateng sesami kawula sadaya, karana saking Labet-Labet Dalem Sang Kristus (bilur-bilur luka, yang jumlahnya ribuan di sekujur badan Tuhan Yesus, akibat penyiksaan dari tentara romawi), langkung-langkung ingkang nembe nandhang sakit, mugi enggal kapulihna kasarasaning jiwa raganipun, kados ing wingi uni, lantaran Kanjeng Ibu Kenya Dewi Maria, ingkang mulus tanpa ciri, lantaran Malaekat Rafael, ingkang pinurba andadosaken kasarasaning jiwa raganipun sadaya titah, amrih kamulyan Dalem, amrih luhuring asma Dalem, tuwin andadosaken rahajenging sukma lan badan kawula, amin. Kawula sakulawarga tansah pasrah sumarah pitados ing Sampeyan Dalem, dhuh Sang Kristus, tuwin mugi kawula sakulawarga tansah saged munjuk sembah nuwun ing ngarsa Dalem, Gusti mugi wontena karsa Dalem paring berkah tuwin pangayoman dhumateng kawula sakluwarga, minangka nanggulangi sadaya piawon, saha karsaa nuntun ingkang abdi, ngantos dumugi ing kalanggengan, amin. Mugi sukma-sukma ing latu pangresikan, langkung-langkung sukmanipun bapak thomas suhardi, mbah partadiwirya kakung putri, mbah wangsasentana kakung putri, mbah dinah kakung putri, bapak herly, mbah suparna kakung putri, mbah surana kakung putri, tuwin sukmanipun para leluwur kawula sadaya ingkang sampun sami sumare ing pundi kemawon, sukmanipun tiyang-tiyang katolik sadaya, sukmanipun tiyang-tiyang ingkang sae pikajenganipun, punapa dene sadaya sukma-sukma ing latu pangresikan, krana sih kawelasan Dalem, mugi sami manggiha katentreman langgeng, amin.

Nyembahyangake Tiyang Sepuh lan semah

Dhuh Allah ingkang maringi sagunging kasaenan, tiyang sepuh tuwin semah kawula, kawula sumanggakaken ing Sih Kadarman Dalem. Sampeyan Dalem dhawuh saha maringi tuladha supados kawula sami ngaosi/ngajeni dhumateng tiyang sepuh tuwin semah kawula. Dhuh Gusti kawula munjuk sembah nuwun, dene Sampeyan Dalem sampun maringi tiyang sepuh tuwin semah ingkang sae makaten, ingkang mboten namung ngreksa wilujenging badan kawula, malah inggih prihatos sanget menggah rahajenging sukma kawula, wonten ing donya ngantos dumugi ing jaman kalanggengan, amin. Dhuh Gusti mugi kawula sampun ngantos mboten gadhah panarimah dhateng kasaenanipun, mandar kaparingana sih pitulungan sagedipun kawula males dhateng prihatos saha pamulasaranipun kala wau, tuwin males adamel kabingahanipun. Dhuh Gusti mugi tiyang sepuh tuwin semah kawula tansah ginanjar bagas kuwarasan, umur panjang, gampil ngupados pangupa-jiwa, saha panglipur wonten ing salebetipun pakewet utawi sakit, punapa malih jiwa raganipun, mugi tinebihna saking beka rencana. Ing wasana katresnanipun dhateng kawula, winalesa ing gesang langgeng, amin.

Nyembahyangake semah lan anak

Dhuh Allah ingkang dados ramaning tiyang sadaya, Sampeyan Dalem priksa bilih kawula tresna sanget dhateng semah tuwin anak-anak kawula, saha mungseng dhateng karahayonipun, amargi punika sampun dados tetanggelan kawula ingkang ageng piyambak. Panyuwun kawula dhuh Gusti: mugi wontena karsa Dalem ngreksa dhateng semah tuwin anak-anak kawula kala wau, katuntuna ngambah margining kautamen, saha mugi sampun ngantos nilar ing Sampeyan Dalem, amargi nglampahi dosa, mugi pinaringana manah ingkang tetep, sampun ngantos kenging panggodhaning tuladha awon, temahan nyimpang saking dhawuh Dalem. Makaten ugi kawula nyuwun berkah Dalem anggen kawula mijeni/muruki watak remen dhatemg prekawis agami katulik tuwin lampah kamursidan, supados wiwit alit sampun mangertos saha tresna ing Sampeyan Dalem. Punapa dene mugi ugi sami kaparingana kawilujengan wonten ing alam donya ngantos dumugi ing alam kalanggengan, amin. Cekakipun mugi tansah winantua ing sih Dalem wonten ing sakathahing bebaya, saha kadumugekna ing kabingahan langgeng ingkang kawula tedahaken marginipun. Dados benjing yen nyawa kawula kapundhut, sakeca manah kawula, dene peparing Dalem semah tuwin anak-anak kawula kala wau sami suwita ing Sampeyan Dalem, mboten wonten ingkang tiwas satunggal-tunggala. Ing wasana begja cilakanipun semah tuwin anak-anak kawula kala wau, kawula sumanggakaken ing ngarsa Dalem, Gusti Allah kawula ingkang Maha Wicaksana sarta Maha Asih, amin.

Nyuwun tansah kaampingan Santo Pangayoman

Dhuh Santo thomas, santa maria margareta, santa maria theresia, santa elyzabeth, santa Maria, santa yustina, santa gabriella, santa bernadeta, santa paulina, santa agatha, santo franciskus xaverius, santo theodorus, santo dionisius, santo leonardus, santo gregorius, santo yohanes, santo hendrikus, santo agustinus, para misionaris tuwin sadaya para suci ing swarga ingkang jumeneng dados pangayoman kawula sakulawarga, nyuwun pangestu dalem lan nyembahHyangaken murih indhaking jembaripun kraton Dalem Gusti, amin. Wiwid kawula sakulawarga sampun kepareng pinundhut dados putra dalem ibu pasamuwan suci katulik srana nampi sakramen baptis, ing batos tansah bingar punapa malih inggih ngatingalaken remening manah dene kalilan tunggil nama kaliyan sang sinuci ingkang rena dados pangayoman kawula sakulawarga. Panyuwun kawula mugi gesang kawula sakulawarga punika tansah pantes rinengga ing asma dalem srana gesang suci nulad tuladha dalem inggih punika: andhap asor, tresna ing pangeran saha tansah resik murni ing salebeting manah. Mugi panjenengan dalem tansah karsa njangkung ing kajeng kawula ingkang sae miwah suci srana nyenyuwunaken dhateng pangeran supados panulad kawula dhateng sang sinuci sageda dados andhaning kasucian ingkang muluk dumugi ing swarga, supados sasampunipun gesang wonten ing tanah pacoben punika kanthi resik murnining manah ing benjing kawula sageda lumebet ing gesang langgeng tunggil kaliyan Sang Kristus gusti kawula ing salami-laminipun, amin.

Nyuwun tansah kaampingan malaekat Pamomong

Dhuh malaikat agung: michael, gabriel, rafael, tuwin sadaya malaekating Allah ing swarga ingkang dados pamomong kula sakulawarga ingkang tuhu setya ingkang kadhawuhan ing pangeran njagi sukma tuwin badan kula, dhuh juru pangreksa tuwin pangayomaning sukma kula ingkang mboten nate nilar kula, kados pundi anggen kula badhe caos atur panuwun dhateng panjenengan awit panjenengan tansah njagi momong kula kanthi setya tuwin katresnan, awit panjenengan temtu njagi menawi kula nembe tilem, panjenengan maringi panglipur menawi kula nembe susah, mbombong saha paring lejar menawi kula saweg prihatos saha kendak ing manah, sedaya bebaya ingkang nyaketi panjenengan bengkas dene menawi bebaya kala wau taksih tebih panjenengan lajeng ngirid kula medal margi padhang, panjenengan paring pitedah dhateng tindak kasaenan saha mboten nglilani menawi kula bahde alampah duraka, dene menawi kula estu dhumawah ing dosa margi kirang pangatos-atos kula utawi kasekengan kula, panjenengan mboten kendhat ngrerimuk kula supados keduwung ing manah, punapa malih panjenengan lajeng nyenyuwunaken pangapunten dhateng Gusti Allah, menggah panjenengan mboten tresna saha nyenyuwunaken dhateng pangeran murih lejaring Dalem kula mbok menawi sampun klebet ing naraka. Milanipun dhuh malaekat pamomong kula, kula ngasih-asih ing panjenengan: mugi sampun karsa nilar kula, mugi paringa panglipur wonten ing salebeting pakewet mandhegani yen wonten bebaya saha paringa pitulungan wonten ing salebeting panggodha, supados kula sampun ngantos kenging jireting setan, mugi karsaa ngunjukaken sembahHyangan pasambat saha padamelan kula wonten ing ngarsa Dalem Gusti Allah Hyang Rama, punapa malih mugi krana Sih Dalem Gusti kula sageda lumebet ing gesang langgeng, amin.

Nyuwun samadi

Dhuh Gusti Allah Hyang Rama, inggih namung Sampeyan Dalem ingkang jumeneng misesa sadaya gegadhahan kawula, sinten ta kawula punika dene kamipurun munjuk ing Sampeyan Dalem, kawula punika rak namung abdi Dalem ingkang sakelangkung asor tuwin sakelangkung nistha, malah langkung asor saha langkung nistha katimbang pangertosan kawula tuwin anggen kawula mastani, dhuh Gusti mugi karsaa manggalih: kawula punika sanes punapa-punapa, kawula punika mboten gadhah punapa-punapa sarta kawula punika mboten saged punapa-punapa, namung Sampeyan Dalem ingkang jumeneng leres, adil, lan suci, Sampeyan Dalem saged ing samukawis, aparing samukawis, menuhi ing samukawis, namung tiyang dosa ingkang mboten Sampeyan Dalem paringi, dhuh Gusti mugi Sampeyan Dalem enget dhateng Maha Welas Dalem, sarta mugi-mugi ngebakana manah kawula srana Sih Pitulungan Dalem, Sampeyan Dalem temtu mboten ngarsakaken menawi pakaryan Dalem muspra tanpa tanja, kados pundi anggen kawula saged ngemban pepesthen kawula wonten ing salebeting papa cintraka punika menawi Sampeyan Dalem mboten maringi kekiyatan dhumateng kawula srana Maha Welas Dalem saha Sih Dalem. Milanipun dhuh Gusti mugi Sampeyan Dalem sampun ngungkuraken kawula, mugi sampun semados malih anggen Sampeyan Dalem badhe rawuh, mugi Panglipur Dalem sampun kapundhut wangsul supados manah kawula mboten dados siti bera tanpa toya, dhuh Gusti nyuwun wulang supados saged ngestokaken Karsa Dalem sarta ngabdi Sampeyan Dalem kanthi pantes tuwin andhap asor, awit Sampeyan Dalem ingkang jumeneng waskitha, ingkang priksa dhateng kawula ing sanyatanipun, sarta ingkang priksa dhateng kawula saderengipun jagad dumados sarta saderengipun kawula sakulawarga lair wonten ing alam donya, amin.

Nyuwun katentreman Kanjeng Ibu Kenya Dewi Maria
(SembahHyangan dalem ingkang Susanta kanjeng santo bapa paus pius 12)

Dhuh Kanjeng Ibu Kenya Dewi Maria, Ratuning rosario suci, Bantuning tiyang katulik, pangungsening bangsa manungsa/tiyang dosa, panjenengan ingkang sasap saben-saben wonten ing perang salib konjuk ing Allah, kawula sami jengkeng ngasih-asih ing ngajenging dhampar Dalem penuh ing pitajeng bilih panjenengan dalem badhe ngangsalaken sih palimirma dhateng kawula saha badhe maringi sih nugraha pitulungan ingkang ngetrepi wanci tuwin pangayoman wonten ing salebetipun kathah pancabaya kados samangke, mboten margi lelabetan kawula ingkang mboten kawula endel-endelaken sakedhik-kedhika, nanging mligi amargi saking agenging kasaenanipun tyas dalem ingkang ambeg ibu. Sesarengan kaliyan pasamuwan suci katulik salira dalem ingkang putra Sang Kristus ingkang kineker, ingkang wonten ing papan panggenan ingkang semanten kathahipun, nandhang sangsara akuthah rudira tuwin kenging pacoben ingkang semanten awratipun, punapa malih sesarengan kaliyan saindenging buwana ingkang pinecah pilah amargi memengsahan ingkang sereng sarta binesmi ing latuning sesengitan, mila inggih dados kurbaning piawonipun piyambak, kawula sami ngunjukaken saha masrahaken jiwa raga kawula sakulawarga dhateng tyas dalem ingkang tanpa ciri ing saating bangsa manungsa ingkang anggegirisi kados samangke punika, sumangga kawula aturi mriksani kanthi penuh ing kawulasan dhumateng kasangsaran ing babagan jasmani tuwin kasusilan ingkang semanten kathahipun: dhumateng sadayaning kasusahan, was sumelangipun tiyang sepuh bapa biyung, semah, para sadherek jaler tuwin estri, lare-lare ingkang tanpa dosa, dhumateng sadayaning nem-neman ingkang pinunggel gesangipun, dhumateng jisim-jisim ingkang rontang-ranting wonten ing pacampuhan ingkang anggegilani, dhumateng sukkma-sukma ingkang telas ing pangajeng-ajeng tuwin miris ing pejah utawi ingkang dhumawah ing bebaya badhe kacilakan ing salanggengipun, dhuh Kanjeng Ibu Kenya Dewi Maria, ibu ingkang ambeg welas, kawula aturi nyuwunaken katentreman dhumateng Gusti Allah Hyang Rama kangge kawula, langkung-langkung sih nugraha ingkang sanalika saged martobataken manahing para manungsa, sih nugraha ingkang nyedhiyakaken, ndhapuk, saha nyentosakaken katentreman. Dhuh Kanjeng Ibu Kenya Dewi Maria ratuning katentreman, nyuwun kawelasan dalem lan mugi karsaa maringi dhateng donya, ingkang saweg andon perang, katentreman ingkang sanget ing ngantu-antu para bangsa, katentreman ingkang ngemu kasunyatan, kaadilan, tuwin katresnan Dalem Sang Kristus, mangestanana supados sami seleh dedamel lan sumeleh manahipun, amrih kratoning Allah sangsaya mindhaka wiyar amargi wontening tata tentrem, kawula aturi anjangkung dhumateng sadaya tiyang ingkang sami mboten pitados, dhumateng sadaya kemawon ingkang taksih sami ngaleleh wonten ing bayanganing pepejah, sami pinaringana katentreman tuwin kagebyurana sunaripun suryaning kasunyatan, supados kados dene kawula sami sageda wongsal-wangsul munjuk ing ngarsanipun sang panebusing jagad ingkang sawiji: pakurmatan konjuka dhumateng Allah ing ngaluhur lan katentreman rumentaha ing donya dhumateng para tiyang ingkang sae manahipun. Maringana katentreman dhumateng sadaya bangsa ingkang sami misah amargi panasaran utawi sesempalan, langkung-langkung dhumateng sadaya tiyang ingkang sami manja bektinipun dhumateng panjenengan dalem, ngantos mboten wonten griya ingkang sepen pakuratan dhumateng reca dalem ingkang samangke saged ugi saweg kasingkiraken ngentosi wekdal ingkang langkung sae, sami kagiringa wangsul dhateng kandhang menda satunggal kagungan dalem Sang Kristus, kaingaha ing pangen satunggal ingkang sejati. Ngangsalna katentreman tuwin kamardikan ingkang wetah dhumateng pasamuwaning Allah, nanggulangana indhaning prabawaning ilmu kapir gagrag enggal, kawula aturi nenangi para pitados amrih sami remen dhumateng kamurnen, dhumateng cak-cakanipun gesang katulik, saha sregep dhumateng tindak karasulan, supados umating Allah sangsaya mindhak-mindhaka jasanipun tuwin cacahipun, ing wasana kados dene rumiyin pasamuwan suci katulik tuwin sadaya bangsa manungsa sampun kaunjukaken dhumateng tyas dalem Sang Kristus, murih sadayaning pangajeng-ajengipun kaborongna ing panjenenganipun, minangka tanda tuwin manjenring kamenangan miwah kawilujengan, makaten ugi ing samangke lan ing salajengipun kawula sakulawarga sami masrahaken jiwa raga dhumateng tyas dalem ingkang tanpa ciri, dhuh Kanjeng Ibu Kenya Dewi Maria, ibu kawula tuwin ratu putrining buwana, mugi karana katresnan sarta pangauban dalem, jaya juriting kratoning Allah kaenggalna tuwin sadaya bangsa manungsa saged sayuk rukun gesang tentrem kaliyan Gusti Allah memuji panjenengan Dalem, punapa malih supados salumahing bumi sakurebing langit sesarengan kaliyan panjenengan dalem sami ngidung “magnificat” tandhaning pangalembana, katresnan sarta atur panuwun dhumateng tyas Dalem Sang Kristus ing salami-laminipun, inggih namung wonten ing tyas dalem Sang Kristus kala wau sadaya bangsa manungsa saged manggih kasunyatan, gegang, saha katentreman, amin.

Nyuwun Sih Peparing Dalem Pepitu Hyang Roh Suci

Dhuh Roh ingkang Suci, sumangga kawula aturi tedhak, saha kawula sami kaluberana ing sih peparing Dalem saking swarga:Sumangga Sampeyan Dalem tedhak, dhuh Rohing Kawicaksanan, manah kawula nyuwun kawulang, kajengipun saged memundhi, tresna, lan ngunggulaken barang kaswargan punika. Kawula nyuwun pitedah rekanipun ngupadosi, saha salajengipun mugi inggih keparenga ugi anggadhahi kanugrahan swarga kala wau ing salami-laminipun, amin.Sumangga Sampeyan Dalem tedhak, dhuh Rohing Budi, pikiran kawula nyuwun padhang, kajengipun saged ngantepi saestu dhateng sadaya piwulanging agami, awit punika ingkang saged damel rahajenging sukma, dados ing benjing kawula lajeng saged pantes lumebet ing pepadhang Dalem, nyawang pepadhang langgeng, punapa malih lajeng kepareng sowan marak ing ngarsa Dalem kaliyan Allah Hyang Rama tuwin Hyang Putra, adhep-adhepan ing sawantahipun, amin.Sumangga Sampeyan Dalem tedhak, dhuh Rohing Pitedah, kawula nyuwun mugi tansah kaampingana ing satindak-tanduk kawula wonten ing jaman ingkang mboten tetep punika. Kawula nyuwun pitedah supados manah kawula tansah mulung dhateng kasaenan, ngipataken piawon, saha kawula mugi lajeng enggal kepareng ngambah ing margining angger-angger Dalem ingkang anjujug dumugi papan ingkang sinedya inggih punika Karahayon Langgeng, amin.Sumangga Sampeyan Dalem tedhak, dhuh Rohing Kasantosan, kawula nyuwun kiyat kajengipun saged panggah santosa yen kenging reribet utawi kasusahan, kawula nyuwun kiyat kangge nulak panempuhing mengsah-mengsah kawula ingkang mbebayani, supados kawula sampun ngantos kawon, mindhak pethal kaliyan Sampeyan Dalem ingkang dados Allah kawula lan bandha kawula ingkang unggul piyambak, amin. Sumangga Sampeyan Dalem tedhak, dhuh Rohing Seserepan, kawula nyuwun mangertos yen barang donya punika temtu badhe sirna tur inggih tanpa guna, perlunipun supados kawula mboten merlok-merlokaken pados barang donya sadaya, dados upami nganggea inggih namung murih kaluhuran Dalem lan andadosaken rahejenging sukma, kejawi saking punika kawula nyuwun mugi kawula tansah ngewrataken dhateng sadaya sih peparing Dalem ganjaran langgeng saking swarga katimbang barang-barang donya sadaya kala wau, amin. Sumangga Sampeyan Dalem tedhak, dhuh Rohing Sungkem dhateng Allah, kawula nyuwun mugi manah kawula tansah katuntuna ngantos sagedipun sungkem ngaosi saha ajrih asih tresna dhumateng Gusti Allah Pangeran kawula terus ing balung sungsum, sageda manah kawula tansah madosi Gusti kanthi agenging pakurmatan saha lajeng manggih Gusti ngadhep ing ngarsa Dalem kanthi katresnan sejatos, amin.Sumangga Sampeyan Dalem tedhak, dhuh Rohing Ajrih Asih tresna dhateng Pangeran, kawula nyuwun mugi badan kawula sakojur tansah gumetera ajrih asih tresna dhumateng Sampeyan Dalem, perlunipun supados mripat kawula tansah nyawang kaluhuran Dalem, Gusti kawula lan Allah kawula, dados kawula saged ajrih asih tresna, dados mboten nate kamipurun anglampahi punapa-punapa ingkang saged damel gerahing penggalih Sampeyan Dalem, Gusti Allah Pangeran kawula ingkang Maha Luhur, amin.Dhuh Roh ingkang Suci, sumangga kawula aturi tedhak saha angedhaton ing manah kawula, saha mugi angagengna urubing katresnan kawula, Gusti mugi midhangetna unjuk kawula, lan pasambat kawula dumugia ing ngarsa Dalem, amin.Suwawi sami munjuk: dhuh Gusti abdi Dalem kawula sakluwarga sami ngasih-asih mugi Hyang Roh Suci karawuhna wonten ing manah kawula awit anggen kawula sami tinitah punika inggih saking kawicaksanan Dalem, tuwin mugi gesang kawula ing salajengipun ugi tansah jinangkung ing sih palimirma Dalem Hyang Roh Suci, lantaran Sang Kristus Gusti kawula, amin.