NOVENA HYANG ROH SUCI

Novéna katindakakên sangang dintên, wiwit jemuwah sasampunipun riaya mékrad Dalêm ngantos dinten sêtu sadèrèngipun Riaya Péntakosta.

Pambuka

P   Konjuk ing asma Dalem Hyang Rama, saha Hyang Putra tuwin Hyang Roh Suci.

U   Amin.

P   Dhuh Roh ingkang suci, sumangga kawula aturi têdhak ing manahipun abdi Dalem tiyang pitados saha ngurubna katrêsnanipun sarana urubing katrêsnan Dalêm.

P   Mugi karsaa maringi Roh Dalêm ingkang lajêng badhé nggêsangakên samukawis.

U   Saha ngénggalakên kawontênaning jagad.

P   Suwawi sami munjuk:

     Dhuh Allah, ingkang sampun karsa paring piwulang dhatêng manahipun para tiyang ingkang sami pitados srana pêpadhang Dalêm Hyang Roh Suci, mugi abdi Dalêm kawula sami kalilanana ngraosakên kawicaksanan ingkang sêjatos wontên ing Hyang Roh Suci wau, saha tansah manggih kabingahan margi panglipur Dalêm Hyang Roh Suci. Lantaran Sang Kristus, Gusti kawula.

U   Amin.

Sasampunipun pambuka kalajengaken sembah-yangan miturut dinten novéna.

Dina Kapisan

Allah sumbêring kawilujêngan kawula, karana wungu Dalêm Sang Kristus, kawula kalairakên malih wontên ing pambaptisan lan ngambah gêsang énggal. Katuntuna manah kawula nuju Sang Kristus, ingkang sapunika lênggah ing satêngên Dalêm. Mugi-mugi Hyang Roh Suci tansah njagia kawula ngantos Sang Kristus rawuh malih mangagêm kamulyan, sapunika sarta ing salami-laminipun. Amin

Dina Kapindho

Allah mahawicaksana, Putra Dalêm naté ngandika badhé paring Hyang Roh Suci dhumatêng para Rasul lan prajanji punika kapênuhan sasampunipun mékrad dhatêng swarga. Mugi, kawula ugi pinaringan bêrkahing Hyang Roh Suci. Lantaran Sang Kristus, Gusti kawula, sapunika sarta ing salami-laminipun. Amin

Dina Katelu

Allah kawilujêngan kawula, kawula pitados bilih Sang Kristus manunggil ing Sampéyan Dalêm wontên ing kamulyan. Mugi Rohipun tansah ngamping-ampingi kawula ngantos dumugi pungkasaning jaman, kados ingkang sampun dipun pangandikakaken. Awit Panjênênganipun punika Gusti kawula, sapunika sarta ing salami-laminipun. Amin

Dina Kapat

Allah ingkang mahasuci, mugi kakiyatanipun Roh Dalêm karêntahna dhatêng kawula, supados kawula sagêd nindakakên karsa Dalêm kanthi sêtya lan mujudakên karsa Dalêm wau wontên ing gêsang kawula. Lantaran Sang Kristus, Gusti kawula, sapunika sarta ing salami-laminipun. Amin

Dina Kalima

Allah ingkang mahakuwaos lan mahasuci, mugi Hyang Roh Suci têdhak lan dêdalêm ing kawula, saéngga kawula dados kênisahing kamulyan Dalêm. Lantaran Sang Kristus, Gusti kawula, sapunika sarta ing salami-laminipun. Amin

Dina Kanem

Allah ingkang satunggal, Sampéyan Dalêm sampun manunggilakên Pasamuwan ing Hyang Roh Suci. Mugi kawula tansah ngabdi Gusti kanthi manah ikhlas, lan manunggil sayêktos ing katrêsnan. Lantaran Sang Kristus, Gusti kawula, sapunika sarta ing salami-laminipun. Amin

Dina Kapitu

Allah ingkang mahasuci, karêntahna Hyang Roh Suci ing manah kawula, saéngga kawula sagêd ngêmban karsa Dalêm lan tinampi pantês dados kagungan Dalêm. Lantaran Sang Kristus, Gusti kawula, sapunika sarta ing salami-laminipun. Amin

Dina Kawolu

Allah sumbêring pêpadhang langgêng, margining gêsang langêng sampun binuka awit saking Sri Yésus ingkang dipun mulyakakên lan Hyang Roh Suci ingkang kautus. Mugi katrêsnan lan kapitadosan kawula sangsaya ngrêmbaka. Lantaran Sang Kristus, Gusti kawula, sapunika sarta ing salami-laminipun. Amin

Dina Kasanga

Allah ingkang mahakuwasa, Putra Dalêm ingkang wungu sampun nuwuhakên gêsang énggal wontên ing dhiri kawula. Mugi awit saking pitulungan Hyang Roh Suci, kawula sagêd mujudakên nugraha wungunipun Sang Kristus wontên ing gêsang kawula padintênan. Lantaran Sang Kristus, Gusti kawula, sapunika sarta ing salami-laminipun. Amin.

Sasampunipun sembahyangan mirunggan miturut dintenipun, kalajengaken sembahyangan Rosario Hyang Roh Suci miturut tuntunan ing ngandhap.

ROSARIO HYANG ROH SUCI

mBangun Kêduwung

Allah ingkang Maha Wêlas, kawula kêduwung, déné kawula, amargi dosa kawula, pantês kapatrapan siksa saking Sampéyan Dalêm. Langkung-langkung amargi kawula ngantos adamêl gêrahing pênggalih Sampéyan Dalêm, Gusti Allah kawula ingkang Maha Luhur, ingkang misaèni dhatêng kawula tanpa wangênan, sarta jumênêng tuking sadaya kasaénan. Kawula gêthing dhatêng sadaya dosa kawula, saha gadhah niyat, srana sih pitulungan Dalêm, badhé nglêrêsakên gêsang kawula, tuwin mbotên badhé anglampahi dosa malih-malih. Gusti, kawula tiyang dosa, nyuwun kawêlasan Dalêm. Amin.

Hymnê Rawuha Roh Ingkang Murba

Lagu:   1  7<  1  3  3  3  4  3 .‘’  3   4  5  5  5  5  4  3 . ‘

            5  5  4  3  1  7 < 6<  7 .< ‘   7<  7<  1  3  3  4  5  3 .  ‘

Panutup ‘Amin’ :  7< .  1 . 3 . ||

Rawuha Roh ingkang murba,

Nuwènana manah amba,

Angluberna sih nugraha,

Dhateng amba titah papa

Dhuh Paduka Sang Panglipur,

Sihing Allah kang linuhur,

Tuking gesang tresna mubyar,

Jebad ingkang karya lejar.

Asta Dalem Sang Trimulya,

Lantaraning sih kang sapta,

Kasagahan Dalem Rama,

Ingkang paring pamicara.

Nyuwun padhang budi amba,

Nyuwun manah asih tresna,

Badan ringkih nyuwun rosa,

Kakiyatna kang santosa.

Mengsah amba tinebihna,

Jiwa amba tinentremna,

Amrih tansah tuhu setya,

mBoten dhawah ing bebaya.

Nyuwun uning mring Hyang Rama,

Mangertosa mring Hyang Putra,

Saha dhateng Hyang Roh Suci,

Pitadosa ing salami.

Minulyakna Allah Rama,

Hyang Putra, Sang Wungu séda,

Hyang Roh Suci linuhurna,

Sapunika salaminya. Amin.

Prakawis kapisan

Ing panguwasaning Hyang Roh Suci, Gusti Yésus kagarba dening Ibu Kenya Maria (Luk 1:35)

Ujud mirunggan:

Mangga kita sami nyuwun sih pitulungan Dalem Hyang Roh Suci lan lantaranipun Ibu Kenya Maria supados saged mujudaken kautamèn-kautamèn Dalem Sang Kristus lan nuladani sadaya kautamèn wau, saéngga kita saged ngèmperi  Sang Kristus, Sang Hyang Putra.

----wening sawetawis----

Rama Kawula…..  Sembah bekti…….

Mugi linuhurna ….(7x).

Prakawis Kapindho

Hyang Roh Suci Tedhak ing Sang Kristus (Mat 3:16)

Ujud mirunggan:

Mangga kita sami nyuwun sih pitulungan Dalem Gusti, supados saged njagi ngantos tumekaning pati, nugraha adi, rahmating kasucian ingkang sampun karentahaken lan katanem ing sukma kita karana Hyang Roh Suci rikala nampi Sakramèn Baptis. Kita ugi nyuwun supados, saged netepi prajanji baptis ingkang sampun naté kaaturaken: lumantar gesang iman, pengajeng-ajeng lan katresnan ingkang mawujud saha tansah gesang pantes dados putra-putra Dalem lan warganing Pasamuwan ingkang sejatos, supados mbénjing saged nampi warisaning kaswargan.

----wening sawetawis----

Rama Kawula…..  Sembah bekti…….

Mugi linuhurna ….(7x).

Prakawis Katelu

Hyang Roh Suci nuntun Gusti Yesus nuju ing ara-ara samun (Luk 4:1-2).

Ujud mirunggan:

Mangga sami ngaturaken raos panuwun awit sih paring Dalem pepitu rikala nampi Sakramen Kasantosan: Rohing Kawicaksanan, Rohing Budi, Rohing Pitedah, Rohing Kasantosan, Rohing Seserepan, Rohing Sungkem, lan Rohing Ajrih-Asih. Mangga ugi masrahaken dhiri sawetahipun wontening tuntunan Dalem, saéngga wonten ing arupi pacobèn lan panggoda punapa kémawon, kita tansah tatag saha tumindak dados tiyang Kristen sejatos lan laskar Kristus ingkang santosa.

---wening sawetawis---

Rama Kawula….. Sembah bekti….  

Mugi linuhurna ….(7x).

Prakawis Kapat

Hyang Roh Suci makarya wonten ing Pasamuwan (Ras 2:2.4.11)

Ujud mirunggan:

Mangga sami ngaturaken panuwun dhumateng Gusti ingkang karsa ngangkat kita dados warganing Pasamuwan, ingkang tansah dipun jiwani lan dipun tuntun déning Hyang Roh Suci, Roh ingkang kautus dhateng donya ing dinten Pèntakosta. Mangga sami ngugemi lan netepi dampharipun Bapa Paus, wakilipun Hyang Roh Suci, ingkang tan kena luput, saha Pasamuwan, saka guru lan dhasaripun kasunyatan. Piwulangipun kajunjunga lan hak-hakipun kabélanana.

---wening sawetawis---

Rama Kawula….. Sembah bekti…….

Mugi linuhurna ….(7x)

Prakawis Kalima

Hyang Roh Suci dedalem ing sukmanipun para pinitados. (1Kor 6:19; 1Tes 5:19; Eph 4:30).

Ujud mirunggan:

Mangga sami ngakeni Hyang Roh Suci ingkang dedalem ing manah kita saha njagi sucining badan lan sukma kita supados kita ugi saged tansah ndhèrèk tuntunanipun saèngga ngasilaken wohing Hyang Roh Suci piyambak: katresnan, kabungahan, katentreman, kasabaran, kabecikan, sarèh-legawa, percaya, lembah-manah lan nguwasani dhiri.

---wening sawetawis---

Rama Kawula….. Sembah bekti…….

Mugi linuhurna ….(7x).

Nyuwun Sih Peparing Dalem Pepitu

Hyang Roh Suci

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Kawicaksanan. Manah kawula nyuwun kawulang, amrih saged memundhi, tresna, lan ngunggulaken prakawis kaswargan. Kawula nyuwun pitedah rékanipun ngupadosi, saha lajeng nggadhahi kanugrahan swarga wau ing salami-laminipun.  Amin.  Rama Kawula.......

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Budi. Pikiran kawula nyuwun padhang, amrih sageda mangertos lan ngantepi saèstu dhateng sadaya piwulang agami, awit punika ingkang adamel rahayuning sukma. Dados ing mbénjing kawula lajeng saged pantes lumebet ing pepadhang Dalem, nyawang Pepadhang langgeng, punapa malih kepareng sowan ingarsa Dalem kaliyan Hyang Rama tuwin Hyang Putra, aben ajeng ing sawantahipun. Amin. Rama Kawula......

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Pitedah. Kawula Sampéyan Dalem ampingi ing satindak-tanduk kawula wonten ing jaman ingkang mboten tetep punika. Kawula nyuwun sageda manah kawula mulung dhateng kasaénan, ngipataken piawon, saha lajeng keparenga ngambah margining angger-angger Dalem, ingkang anjujug dumugi papan ingkang sinedya, inggih punika karahayon langgeng. Amin. Rama kawula.....

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Kasantosan. Manah kawula nyuwun kiyat, amrih sageda panggah santosa, yèn manggih reribet utawi kasusahan. Kawula nyuwun kiyat, kanggé nulak panempuhing mengsah-mengsah kawula ingkang mbebayani, supados kawula sampun ngantos kawon, mindhak pethal kaliyan Sampéyan Dalem, ingkang dados Allah kawula lan Bandha kawula ingkang unggul piyambak. Amin. Rama kawula.......

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Seserepan. Kawula nyuwun mangertos, yèn barang donya punika temtu badhé sirna tur inggih tanpa guna. Perlunipun supados kawula mboten merlok-merlokaken pados barang donya wau; dados upami nganggéa inggih namung murih kaluhuran Dalem lan rahayuning sukma kawula. Kejawi punika kawula nyuwun, sageda ngawrataken paring Dalem ganjaran langgeng, katimbang barang-barang donya. Amin. Rama kawula......

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Sungkem dhateng Allah. Manah kawula katuntuna ngantos saged sungkem-ngaosi saha ajrih-tresna dhateng Gusti, Pangéran kawula, terus ing balung-sungsum. Sageda manah kawula tansah madosi Gusti kanthi genging pakurmatan, saha lajeng manggih Gusti, ngadhep ingarsa Dalem kanthi katresnan sejatos. Amin. Rama kawula.......

P   Dhuh Roh ingkang Suci, sumangga kawula aturi tedhak, saha kawula sami kalubèrana ing sih peparing Dalem saking swarga.

U   Sumangga kawula aturi tedhak, O, Rohing Ajrih Asih dhateng Pangéran. Kawula nyuwun supados badan kawula sakojur gumetera ajrih dhateng Sampéyan Dalem. Perlunipun supados mripat kawula tansah nyawang kaluhuran Dalem, Gusti kawula lan Allah kawula, dados kawula saged ajrih lan dados mboten naté kamipurun nglampahi punapa-punapa ingkang saged damel duka Dalem, Allah ingkang Mahaluhur. Amin. Rama kawula.....

Panutup

P   Dhuh Roh ingkang Suci, sumangga kawula aturi tedhak sarta ngedhaton ing manah kawula.

U   Saha ngagengna urubing katresnan kawula.

P   Gusti mugi nyembadanana panyuwun kawula.

U   Lan pasambat kawula dumugia ingarsa Dalem.

P   Suwawi sami munjuk:

Dhuh Gusti, kawula sami ngasih-asih nyuwun kawelasa. Mugi Hyang Roh Suci karawuhna wonten ing manah kawula. Awit anggèn kawula sami tinitah punika inggih saking kawicaksanan Dalem saha salajengipun inggih tansah jinangkung ing palimirma Dalem Hyang Roh Suci wau. Lantaran Sang Kristus, Gusti kawula. Amin.

†††

ROSARIO KASETYAN

Rosario Padinan Ing Wulan Mei

“SETYA MARANG PIWULANG DALEM GUSTI, TANDHANING KATRESNAN SEJATI”

Per Mariam ad Jesu, lumantar Ibu Maria, mangga kita sami nglelimbang pakaryan kawilujengan Dalem Gusti ingkang saklangkung ngéram-éramaken supaya bisaa sangsaya pantes nampi ganjaran kaswargan, ngemungaken dhawuh-dhawuh Dalem Gusti lan nilar karemenanipun/kekajenganipun piyambak.

Awit sadaya dosa punika asalipun saking anggènipun kita namung mburu lan ngemungaken karemenan kita piyambak lan nilar dhawuh-dhawuh utawi karsa Dalem Gusti. Kita lajeng dhumawah ing dosa, inggih dosa alit punapa dosa ageng.

Pramila saé menawi ing wulan Mei punika, wulan mirunggan kanggé nglelimbang tuladha dalem ibu Maria ingkang sampun nampi ganjaran makuthaning swarga. Kita sacara mirunggan mijèkaken wekdal, pikiran, tenaga lan jiwa raga kita kanggé nglelimbang gesang kita piyambak lan wantun nulad tuladha dalem Ibu Maria, kados pundi tansah “sandika” ing dhawuh Dalem Gusti, lan nilar punapa ingkang dados pikiran, rasa pangrasa, niyat lan manahipun piyambak. Ibu Maria wantun nilar kekajenganipun, lan ngudi supados karsa Dalem Gusti, ingkang sajatosipun awrat anggènipun nampi, nanging awit saking kapitadosanipun, Ibu Maria nampi lan nindakaken kanthi bingah.

Kanthi nglelimbang kautamènipun Ibu Maria, kita ugi kaajak supados wantun nilar kekajengan kita piyambak ingkang tuwuh saking pikiran, manah, rasa pangrasa punapa dènè niyat, supados kita sangsaya saged gesang lan nindakaken samubarang ingkang dados karsa Dalem Gusti, inggih wonten ing diri pribadi kita piyambak, inggih wonten ing pangudi mbangun katresnan jati ing brayat, inggih anggenipun mbangun pasrawungan saé ing tengahing masyarakat lan Pasamuwan.

Kabegjan (kebahagiaan) jati punika mboten ateges sadaya kekajengan kita kalampahan, ananging awit karana kita saged nindakaken dhawuh-dhawuh Dalem Gusti kanthi setya lan nilar ingkang dados kekajengan kita piyambak.

Mugi Gusti Allah ingkang mahatresna lan sampun labuh labet kanthi ngasoraken diri kanggé nebus kita saking dosa-dosa, paring berkah supados kita saged ngudi gesang ingkang saé lan murakabi tumrap sarasing jiwa lan raga kita, ngantos dumugining gesang langgeng. Amin.

Lan yèn ing samangké kita tinimbalan Gusti, kita saged kanthi bingah lan tentrem nampi rawuh Dalem Gusti, awit sampun kanthi wetah nindakaken karsa Dalem, “…..padha wulangen mbangun-turut marang sakèhing piwulang sing wis Dakwulangaké marang kowé." (Mat 28:20a).

Kanthi katresnan,

ykristiyanta,pr

SEMBAHYANG TESBÈH

Tandha Pamenthangan…

Kawula Pitados…..

Mugi Linuhurna…..

Pinujia….

Sembahyangan Fatima

Dhuh Gusti ingkang mahasaé, kaapuntena dosa-dosa kawula. Kawilujengna kawula saking geni naraka, lan karsaa nampi para sukma mlebet ing swarga, langkung-langkung para sukma ingkang mbetahaken sih palimirma Dalem. Amin.

Rama Kawula……

Sembah Bekti Katur Ing Putra Putri Dalem Sang Hyang Rama.

Sembah bekti kawula,….....

Sembah Bekti Katur Ing Ibu Dalem Sang Hyang Putra.

Sembah bekti kawula, ….…

Sembah Bekti Katur Ing Pramèswari Dalem Sang Hyang Roh Suci.

Sembah bekti kawula,..…...

Mugi Linuhurna…..

Pinujia…..

(Kalajengaken prakawis-prakawis Rosario. Sasampunipun rampung katutup mawi sembahyangan panutup ing ngandhap.)

PRAKAWIS KABINGAHAN

Dina senèn, setu, mangsa Adven lan Mangsa Natal

1. Malaékat Gabrièl Nglantaraké Dhawuh Marang Ibu Maria.

Nanging Malaékat ngandika, "Sampun ajrih Maria, panjenengan sampun manggih sih ing ngarsaning Allah. Lha punika panjenengan badhé anggarbini sarta mbabar putra kakung ingkang kedah panjenengan paringi asma Yésus." (Luk 1:30-31)

Ujub: Mugi kados tuladhanipun Ibu Maria, kawula tansah ngemungaken dhawuh-dhawuh Dalem, lan wantun setya dumugining pejah.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

2. Ibu Maria Tuwi Santa Elisabét.

Lan sakala bareng Elisabèt ngrungu Dèwi Maria uluk salam, jabang bayi ing guwa-garba nglumba lan Elisabèt dhéwé kapenuhan ing Hyang Roh Suci banjur nguwuh kanthi sora sarta munjuk, "Sami-sami wanita panjenengan tuhu pinuji lan pinuji ugi wohing guwa-garba panjenengan." (Luk 1:41-42)

Ujub: Muga kados tuladhanipun santa Elisabèth, kawula wantun nindakaken tuntunanipun Hyang Roh Suci amrih sageda gesang suci.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

3. Sang Kristus Miyos Ing Bètlehèm

Lan mbeneri ana ing kana mau, Maria wanciné mbabar. Panjenengané mbabar putra kakung pambajeng kang nuli ginedhong ing gombal lan kasèlèhaké ana ing pamakanan awit ing panginepan wis ora oman papan. (Luk 2:6-7)

Ujub: Mugi kados déné miyosipun Gusti Yésus, kawula saged tetep setya ing kasucian lan kasunyatan, langkung-langkung rikala ngadhepi pengalamaning gesang ingkang awrat.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

4. Sang Kristus Dicaosaké Ana Ing Padaleman Suci .

Lan Siméon nambut Sang Timur binopong sarwa memuji Allah, unjuké : "Ing samangké pun abdi kalilana mundur kanthi tentrem dhuh Pangéran, manut sabda Dalem, awit mripat kawula sampun nyipati pangentasan Dalem." (Luk 2:28-30) .

Ujub: Mugi kados déné pangajeng-ajengipun Siméon, kawula tansah ngudi gesang suci amrih sangsaya ngraosaken katentremaning sukma sapunika lan ing tembé rikala Gusti nimbali kawula.

† Rama Kawula….

† Sembah bekti……(10x)

† Mugi linuhurna………..; Pinujia……...

† Sembahyangan Fatima….

5. Sang Kristus Kapanggih Ana Ing Padaleman Suci.

Ing telung dinané ketemu ana ing padaleman suci, lenggah ing antarané para guru, mirengaké sarta tetakèn. Kabèh kang ngrungu padha gumun marang landheping panggrahita lan wangsulané. (Luk 2:46-47)

Ujub: Mugi kados déné para guru ingkang miring lan kasengsem dhateng Gusti Yésus, kawula ugi sangsaya nresnani Sang Kristus kanthi gumolonging manah, gumolonging budi, lan gumolonging kekuatan kawula.

† Rama Kawula….

† Sembah bekti……(10x)

† Mugi linuhurna………..; Pinujia……...

† Sembahyangan Fatima….

PRAKAWIS SUMUNAR

Dina Kemis

1. Gusti Yésus Dibabtis Ana Ing Bengawan Yordhan.

Lan dhèk samana Gusti Yésus rawuh saka Nasarèt ing tanah Galiléa, sarta dibabtis Yoanes ana ing Bengawan Yordhan. Lan sanalika bareng mentas saka ing banyu, banjur pirsa ing langit sigar, lan Hyang Roh Suci pindha dara tumurun, lan nedhaki Panjenengané. Banjur ana swara dumeling saka ing langit, "Kowé iku Putra-Ku kinasih. Kowé kang gawé rena-Ku." (Mrk 1:9-11).

Ujub: Mugi kanthi setya dados pandhérék Dalem Sang Kristus lan ngèstokaken sabda-sabda Dalem, kawula ugi pantes nampi ganjaran kaangkat dados putra-putra Dalem kinasih Allah Hyang Rama.

† Rama Kawula….

† Sembah bekti……(10x)

† Mugi linuhurna………..; Pinujia……...

† Sembahyangan Fatima….

2. Gusti Yésus Paring Pratéla Ana Pangantènan Ing Kana.

Ibu Dalem banjur ngandika marang para abdi, "Kabèh kang didhawuhaké tindakna!" Ing kana ana genthong watu enem, dipasang kanggo wisuh miturut padatan cara Yahudi. Siji-sijiné bisa amot loro utawa telung metreta. Gusti Yésus banjur dhawuh, "Genthong iku kebakana banyu." Genthong padha diisèni nganti kebak mancep. Nuli Gusti Yésus dhawuh, "Saiki cidhukana lan caosna ,marang sing ngasta pramugari." Iya banjur dicaosaké. (Yoh 2:5-8).

Ujub: Mugi kados déné para abdi, kawula sangsaya pitados bilih sabda-sabda lan dhawuh-dhawuh Dalem Gusti dados sumbering kawilujengan lan kabegjaning gesang kawula.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

3. Gusti Yésus Wiwit Mucal Lan Dhawuh Padha Martobat.

Bakda Yoanes dicekel, Gusti Yésus banjur tindak menyang Galiléa, martakaké kabar kabungahan kang tumurun saka Allah. Pangandikané, "Wus tekan titi-mangsané, kratoning Allah wus cepak. Padha martobata lan ngandela marang kabar kabungahan." (Mrk 1:14-15).

Ujub: Mugi kapitadosan dhateng kabar kabungahan lan sikap penuh pamartobat ingkang dipun wartosaken Sang Kristus estu kawula tindakaken ing gesang saben dintenipun supados kawula pantes nampi ganjaran kawilujengan Dalem.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

4. Gusti Yésus Kamulyakaké Ana Ing Gunung Tabor.

Lan let enem dina Gusti Yésus ngathi Pétrus, Yakobus, lan Yoanes diajak minggah ing gunung dhuwur, miyambak. Lan Gusti santun warni ana ing ngarepé. Agemané dadi sumorot putih memplak. Ana ing donya ora ana wong bisa musoni sing mengkono. Nabi Elias lan Nabi Musa padha ngatingal, lan ngendikan karo Gusti Yésus. (Mrk 9:2-4).

Ujub: Mugi kados déné para murid pinilih, kawula saged ngraosaken kamulyan Dalem Gusti ingkang sangsaya adamel manah kawula ajrih asih ing Gusti.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

5. Gusti Yésus Yasa Sakramèn Ekaristi.

Nuli Gusti mundhut roti, munjuk sembah nuwun, roti dicuwil lan diparingaké sarwa ngandika, "Iki Sliraku, kang bakal kaulungaké nglabuhi kowé. Iki tindakna minangka pangéling-éling marang Aku. Semono uga Gusti mundhut tuwung, sawisé dhahar, sarwa ngandhika,"Iki tuwung Prajanjian Anyar ana ing Rahku, kang diutahaké nglabuhi kowé. (Luk 22:19-20).

Ujub: Mugi Pahargyan Ékaristi, sarananing anggèn kawula ngemut-emut pakaryan agung kurban katresnan Dalem, sangsaya dados sumbering iman kapitadosan kawula ingkang manunggilaken kawula kaliyan Gusti.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

PRAKAWIS KASANGSARAN

Dina Selasa, Jumat lan mangsa Prapaskah

1.  Gusti Yésus Sungkawa Ana Ing Taman Jaétun.

"Dhuh Rama, manawi dados karsa Dalem mugi tuwung punika kasingkirna saking kawula, nanging sanès kajeng kawula, karsa Dalem kalampahana." (Luk 22:42).

Ujub: Mugi kados déné Sang Kristus ingkang karsa ngurbanaken Salira lan Rah Dalem pribadi supados karsa Dalem Allah kalampahana, kawula ugi wantun nilar karemenan kawula piyambak lan namung ngestokaken karsa Dalem Gusti.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

2. Gusti Yésus Disapu.

Wong kang padha njaga Gusti, moyoki Panjenengané lan ngantemi. Gusti dikrukubi lan diantemi wadana Dalem sarta bola-bali ditakoni, celathuné, "Wis wacanen, sapa sing ngantemi kowé iki?” Lan isih akèh manèh pitembungané marang Gusti wujud cecamah. (Luk 22:63-65).

Ujub: Mugi mboten kados déné tiyang-tiyang ingkang moyoki lan nyenyamah Gusti, kawula sangsaya saged caos pisungsung gesang lan pangabekti konjuk ing Gusti ingkang pantes.

† Rama Kawula….

† Sembah bekti…….(10x)

† Mugi linuhurna………..; Pinujia……....

† Sembahyangan Fatima….

3. Gusti Yésus Diagemi Makutha Eri.

Lan para prajurit ngenam makutha eri, dietrapaké ing mustaka Dalem. Nuli Panjenengané diagemi sandhangan abang jingga, banjur pada sowan matur, "Pangabekti Ratuning tiyang Yahudi" lan Gusti diantemi." (Yoh 19:2-3).

Ujub: Mugi Gusti ingkang karsa nampi makuthaning eri ing mustaka Dalem, sangsaya ngiyataken kawula bilih nampi kasangsaran awit saking ngugemi kasetyan dados sarananing nampi kamulyan.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

4. Gusti Yésus Manggul Pamenthangan.

Gusti Yésus ditampi lan digawa lunga. Gusti manggul salib Dalem piyambak tindak menyang papan kang diarani Kalpari, tembung Hibrani Golgota. Ana ing kana Gusti disalib lan bebarengan karo Panjenengané ana wong loro kang disalib ngiwa-nengen, déné Gusti Yésus ana ing tengah." (Yoh 19:17-18).

Ujub: Mugi Gusti ingkang manggul pamenthangan kanthi tabah, sangsaya mbikak mripat lan manah kawula bilih kawula ugi kedah manggul salib gesang kawula saben dintenipun kanthi tabah supados kawula saged nilar karemenan kawula piyambak.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

5. Gusti Yésus Séda Ana Ing Pamenthangan.

Kanthi nguwuh swanten sora, Gusti Yésus ngendika, "Dhuh Rama, kawula masrahaken sukma kawula ing asta Dalem, lan ngendika mangkono iku, Gusti Yésus séda. Bareng penatus weruh lelakon mau, mulyakaké Allah, sarta celathu, "Mula nyata Wong iki ora salah." (Luk 23:46-47).

Ujub: Mugi kados déné penatus ingkang martobat, kawula ugi wantun tansah martobat, nilar dosa-dosa lan kasèkèngan supados kawula pantes nampi ganjaran kaswargan.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

PRAKAWIS KAMULYAN

Dina Rebo, Minggu lan Mangsa Paskah

1. Gusti Yésus Wungu Saka Séda.

Malaikat ngandika, “Wis ora ana ing kéné, wis wungu. Élinga marang pangandikané dhék ana ing Galiléya, sing mangkéné uniné : "Wus Pinasthi Putraning Manungsa kudu diulungaké marang tanganing wong dosa, sarta disalib lan ing telung dinané bakal wungu saka séda." (Luk 24:6-7).

Ujub: Mugi pawartos wungu Dalem Sang Kristus, ndadosaken kawula wantun tangi saking dosa-dosa lan mbangun pangajeng-ajeng gesang ingkang laras kaliyan dhawuh Dalem Gusti..

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

2. Gusti Mékrad Menyang Swarga.

Nuli para murid padha diajak nganti tekan Bétania, lan ngumbulaké asta. Gusti maringi berkah lan bareng karo anggoné paring berkah Gusti nilar para rasul, lan kasengkakaké menyang swarga. (Luk 24:50-51).

Ujub: Mugi peparing Dalem Gusti ingkang awujud berkah maneka warni, estu kawula raosaken ing gesang kawula, supados kawula sangsaya namung njagèkaken pitulungan Dalem.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

3. Hyang Roh Suci Tedhak.

Kabèh padha kapenuhan ing Hyang Roh Suci, sarta banjur padha guneman nganggo basa warna-warni, mojar manut sakaparengé Hyang Roh Suci. (Kis 2:4).

Ujub: Mugi kados déné para murid ingkang kadunungan Hyang Roh Suci, kawula sangsaya pitados bilih gesang kawula mboten namung mbujeng karemenan kawula piyambak ananging langkung-langkung gesang miturut tuntunaning Hyang Roh ingkang suci.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

4. Ibu Maria Kapundhut Menyang Swarga.

Nanging kabèh iku ana urut-urutane, sing dhisik dhéwé Sang Kristus, kang jumeneng panunggul, banjur liya-liyané kang dadi kagungan Dalem Sang Kristus, yèn mbésuk rawuh. (1 Kor 15:23).

Ujub: Mugi kawula ingkang sampun kabaptis lan kaangkat dados kagungan Dalem Sang Kristus, keparenga ndhèrèk wungu mulya nunggil Gusti ing swarga.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

5. Ibu Maria Tampi Makutha Ana Ing Swarga.

Ana pratandha katon ing langit, wanodya asingep surya lan rembulan, ana ing sangandhaping pada déné mustakané jinamang lintang rolas. (Why 12:1).

Ujub: Mugi ganjaran kaswargan ingkang sampun dipun tampi déning Ibu Mariyah, sangsaya adamel mongkoging manah kawula bilih setya nglabuhi kasunyatan lan dhawuh-dhawuh Dalem Gusti, dados margining gesang kawula nampi makuthaning swarga.

† Rama Kawula….

† Sembah bekti…….(10x)

† Mugi linuhurna………..; Pinujia……...

† Sembahyangan Fatima….

SEMBAHYANG PANUTUP

PASRAH MARANG IBU KENYA MARIYAH.

Dhuh Sang Kenya ingkang suci linangkung, Dèwi Maria Ibuning Allah, kawula .... (nyebut jenengé dhéwé ing batos)….., sanadyana mboten pantes pisan-pisan ngabdi ing panjenengan dalem, ananging margi katarik ing sih kadarman dalem ingkang ngéram-éramaken punika, sarta saking kapiluyu kawula lumebat dados abdi dalem, sapunika mawi sinèksen Malaékat pamomong kawula, sarta para Minulya ing swarga, milih panjenengan dalem dados Ratu, Pangayoman lan Ibu kawula.

Kawula niyat terusing manah badhé tansah ngabdi paduka. sakwagang kawula inggih badhé mbudidaya, supados panjenengan dalem tansah dipun abdèni tiyang sadaya kanthi setya tuhu.

Milanipun, o Ibu ingkang ambeg tresna, abdi dalem munjuk ngasih-asih, mugi karana Rah Dalem Sang Kristus, ingkang sampun katuntasaken kanggé kawula, keparenga ing penggalih mundhut abdi dalem dados golonganing tetiyang ingkang panjenengan dalem ayomi, sarta winisudha dados abdi dalem ing salanggengipun.

Mugi karsaa tansah njangkung dhateng sapari polah kawula, sarta karsaa nyuwunaken sih, murih sasolah-tingkah kawula sampun pisan-pisan ngantos damel gerahing panggalih dalem, utawi Tyas Dalem Gusti ingkang mahasuci.

O Ibu, mugi kawula punika tansah panjenengan dalem panggalih, sampun ngantos wentala ngoncati abdi dalem ing wekdal ajal kawula. Amin.

†††